04 mey — Eveka tao Gaza i Sylvain, niaina tamin'ny taonjato fahefatra. Olona malemy fanahy sy tia fandriampahalemana izy. Ary dia notanany hatramin'ny fahafatesany ny naha pretra sy naha eveka azy.
Nisy ny fanenjehana ny kristianina tamin'izany fotoana izany ka voaheloka hiasa an-terivozona tany amin'ny fitrandrahana harena an-kibon'ny tany Palestina i Sylvain, niaraka tamin'ireo kristianina 40 hafa namany. Toy ireo olona rehetra voaheloka amin'izany sazy izany dia nalana ny masony ilany ary nodorana amin'ny vy mahamay koa ny tongony iray, rehefa notsaraina izy ireo dia nanome baiko i Maximin Daya fa hotapahina miaraka ny lohan'izy 40 mianadahy ireo. Marihina fa ny amperora Dioclétien no nanjaka tamin'izany fotoana izany.
