10 febroary — Anabavin'i Masindahy Benoît avy any Nursie i Scholastique, toa hoe kambana mihitsy aza izy mianadahy ireo. Teraka ny taona 480 izy ary efa hatramin'ny fahazazany izy no nanoka-tena ho an'Andriamanitra. Taty aoriana dia niditra tao amin'ny trano ftiokana-monina ho an'ny vehivavy izy.
Vantany vao niorina anefa ny trano fitokana-monin'i Masindahy Benoît tao Mont-Cassin, dia nifindra teny akaikiny teny izy ka nanorina trano fitokana-monina tao Piumarola teo am-pototry ny tendrombohitra nisy ny trano fitokana-monina nisy an'i Benoît. Nifanaraka izy mianadahy fa hihaona indray mandeha isan-taona ka trano fitokana-monina iray eo antenantenan'ny lalana mampitohy ny trano misy azy mianadahy no trano atao fihaonana. Amin'izany fotoana izany dia miara-mivavaka, mifanakalo hevitra momba ny fiainam-panahy no ataony ao.
Indray andro rehefa tapitra ny fotoana nanaovan'izy ireo ity resadresaka ara-panahy ity dia nangataka i Scholastique mba hotohizina ny resaka. Nandà anefa i Benoît noho ny fanajany ny fitsipika ao amin'ny fikambanana. Nanohy nivavaka ihany i Scholastique, hany ka raha iny i Benoît handeha hivoaka hamonjy fodiana iny dia avy tampoka ny orana. Nahery dia nahery ny oram-baratra ka tsy afa-nandeha i Benoît. Noho izany dia niara-nivavaka izy mianadahy, tsy maintsy nitafa tamin'ny anabaviny i Benoît mandram-parain'ny andro. Io fotoana io no nihaonan'izy mianadahy farany satria telo andro taorian'izay dia nodimandry i Scholastique ka hitan'i Benoît ny fanahiny niditra tany an-danitra tamin'ny endriky ny voromailala.
Tsy nanorina fikambanana akory i Scholastique, nefa ireo masera bénédictines kosa dia mihevitra azy ho renin'ny fikambanana satria izy no mpitoka-monina vehivavy voalohany mpanara-dia an'i Masindahy Benoît. I Scholastique no antsoina hivavaka raha misy ankizy tratran'ireny aretina mifanintona ireny, ary antsoina ihany koa izy hiaro amin'ny rivo-doza sy ny varatra. Nefa raha sendra main-tany dia antsoina koa izy hitalaho mba hiavian'ny orana toy ny nataony mba hijanonan'ilay anadahiny tao aminy.
