Ny Konsily anisan’ny goavana indrindra dia ny tao Trente (Trento) satria dia ny 22 mai 1542 no nampiantsoin’ny Papa Paul III izy io, ary notohizan’ireo Papa roa nandimby azy dia i Jules III sy i Pio IV (1545-1563), ka taorian’izany no nahazoantsika ny Mesaly Romanina navoakan’i Papa Pio V, izay mbola misy mampiasa mandraka ankehitriny. Ny Bulle Quo primum tempore navoakany ny 14 Jolay 1570 no namoahany azy ho an’ny Eglizy rehetra manaraka ny fomba Latinina. Maro ireo hevitra sy fampianarana mazava navoakan’ny Konsily tao Trente dia ny : Fiarovana ny Soratra Masina (atao hoe Volgata).
Foto-pampianarana momba ny fahotana tamin’ny fototra, ny mikasika ny fanamasina-tena sy ny fahasoavana, ireo Sakramenta, indrindra ny Eokaristia sy ny Lamesa na ny Sorona Masina, momba ny fanajàna ny Sakramenta Masina, ny fanajàna ireo sary masina, ny indolzansy. Fanamelohana ireo hevi-dison’i Lotera sy ny namany.
Ny Konsily Vatikanina I (Roma) kosa dia niezaka nandamina zavatra maro, saingy noho ny ady nipoaka dia nohafohezina ka tsy naharitra, fa vetivety dia novitaina (1869-1870), ka ireto no zavatra tapaka sy nampitainy, ka nahatonga ny fanomezana fahefana feno ny Papa hanao ny fampianarana "Ex-Catedra": Famaritana momba an’ilay Andriamanitra Mpahary, sy ny amin’ny Fanambaran’Andriamanitra, ny Finoana sy ny fifandraisany amin’ny saina mandinika, ny Eglizy, ny maha Filoha faratampony sy “tsy mety diso (infaillibilité)” ny Evekan’i Roma (Papa). Izay dogme nambara mazava ny 18 jolay 1870 ary nofenoina sy nohamafisin’ny Konsily Vatikanina II izany ny 21 novambra 1964.
