Ny Aina sy ny famonjena dia mifamatotra sady tsy misaraka, koa mila mpamonjy izay rehetra tandindomin’ny loza dia ny fahafatesana. Rariny àry ny mampahatsiahy eto fa i Jesoa no hany Mpamonjy antsika, satria ny hamonjy antsika olombelona mba tsy ho faty mandrakizay sy hiaro ny Aina no nahatongavany teto an-tany. Ny kristianina tsirairay izay samy mpanara-dia Azy moa dia natao haka tahaka Azy, ka voalohan’adidin’ny mpino ny mifarimbona hiaro ny Aina sy hiahy ny ain’ny hafa.

Izany no ilana ny fitandremana tsara ny Didin’Andriamanitra izay hany iorenan’ny Lalàna marina sy tena izy, ka mivelatra amin’ny famoronana ireo Dina sy ny Fady isakarazany izany (torolalana momba ireo zavatra tsy azo atao), ho fampiharana ireo fitsipika tsy maintsy arahina… Tsara àry raha samy miezaka sy mifarimbona isika, hiatrika ny Noely sy ny Taombaovao, ao anaty toe-po sy toe-panahy feno fahavononana hiaro ny Aina sy hifarimbona hampanjaka ny rariny sy ny hitsiny.