Sekoly fanofanana arak’asa no sahaza ny besinimaro, ka aza hadino izany ry mpanabe sy ray aman-dreny isan-tsokajiny. Satria izany ihany no lalana fohy sy tsotra indrindra hivoahana amin’ny tsy fananan’asa sy ny fahantrana lavareny mangeja antsika... Koa na ny CEG na ny Lycée na ny Sekoly Ambony ho an’ny fianarana asa dia samy ilaina avokoa. Sambatra lahy ny ao Bongolava fa efa mba manana ny LTA ao Ambohitsoa, ao Tsiroanomandidy.
Koa amporisihina ireo zatovo nahazo ny BEPC mba hanatona sy hanohy ny fianarany amin’ireny toerana ireny, raha te hanana hoavy mamiratra, satria tsy ny asam-birao no mahavelona bebe kokoa fa ny asa fitrandrahana ireo harena sy talenta isakarazany, dia ny fambolena sy fiompiana ary ny jono sy ny fihariana amin’ny endriny maro, toa ny asatanana sy ny nahandro ary ny haitao mbamin’ny ny teknika isakarazany. Mamporisika anareo mpanabe sy ray aman-dreny àry izahay, mba tena handresy lahatra ny taranaka hianatra asa avy hatrany, hananany antom-pivelomana tsara sy mahomby. Mamporisika ny Ministera miahy ny fanabeazana, mba hanapariaka ireo sekoly sy programam-pampianarana natao hanampy ny zatovo sy tanora hampiasa ireo talentany… Mamporisika ireo mpanakarena hanosika ny mpiara-belona aminy, hananany asa mendrika ny maha olona, fa izany no antoky ny fivoarana sy fandriampahalemana.
