Nahazo tohana ara-pitaovana ampiroboroboana ny fiompiana sy ny famokarana tantely ao aminy ireo tantsaha nisitraka fiofanana ao amin'ny Fikambanana Filamatra Soa Iombonana na ny FISOI ao amin'ny Kaominina Mahintsy sy ny Soa Mitsinjo ao amin'ny Kaominina Antanetibe-Mahazaza ato amin'ny distrikan'Ambohidratrimo...

Natao tao amin'ny kaominina Antanetibe-Mahazaza, androany ny fizaràna ireo tranon-tantely ho an'ny mpisitraka ary tany amin'ny toerana fiompiana kosa no nampidirana ny andian-tantely amokatra ny mamin-tantely. Zava-dehibe ho an'ny kaominina izao tantsoroka ho an'ny tantsaha ao aminy izao hoy Andriamatoa Rakotomanjato Lala Séraphin Ben'ny tanàna lefitra.

Ny avy ao amin'ny Ilo Raitra Apiculteur no namokatra ny fitaovana natolotra ny tantsaha mpiompy tantely ao amin'ny FISOI sy ny Soamitsinjo. Vonona hampiroborobo ny fiompiana sy famokarana tantely ireo mpahazo tombotsoa hoy Ramatoa Julie sy Andriamatoa Miandry.

Tamin'ny alalan'ny tetik'asa iarahan'ny Réseau SOA sy ny FFF FAO no nahafahana nampiofana sy namatsiana fitaovana an'ireo tantsaha hisehatra amin'ny fiompiana tantely ireo. Tanjon'ny fiaraha-miasa ny ananganana zotram-pihariana sy rojom-pihariana azo avy amin'ny ala, ka ny fiompiana tantely no nomena sehatra manokana tamin'ity taona ity, mba ahafahana manangana orinasa madinika eny ambanivohitra.