Mbola malalaka ny lalam-barotra any ivelany ho an'ny vokatra tantely. Manana fiaraha-miasa ahafahana manondrana vokatra hatrany amin'ny 18 taonina isan-taona ny Tranoben'ny Tantsaha Mpamokatra Nasiônaly. Lalam-pihariana atao laharam-pahamehana ao amin'ilay tetik'asa andiany farany iarahan'ny FFF FAO na ny Farm and Forest Facility sy ny Tranoben'ny Tantsaha ny fiompiana tantely.

Mikarakara fifaninanana andraisana mpandraharaha mpiompy tantely ao amin'ny vovonam-pikambanana miisa valo mandrafitra azy na ny OPFA ny Tranoben'ny Tantsaha ahafahana mamolavola azy ireo ho mpandraharaha matihanina amin'ny lalam-pihariana ifotorany. Ny telo mendrika indrindra amin'ireo no hahazo tohana ara-pitaovana araka ny fanazavan'ny filoha nasiônalin'ny Tranoben'ny Tantsaha Razafimbololona Ageline.

Mifototra manokana amin'ny fampiroboroboana ny rojo-pihariana avy amin'ny ala ny tantsaha Mpamokatra Nasiônaly sy ny FAO miasa amin'ny alalan'ny FFF na Farm and Forest Facility. Nanazava ny tsara ho fantatra momba ity tetik'asa ity teny Nanisana ny 13 Febroary ny mpitantana sy ireo teknisiana ao amin'ny Tranoben'ny Tantsaha Mpamokatra.

Tanjon'ny tetik'asa ny ahafahan'ny mpamokatra miatrika ny fiovan'ny toetr'andro sy hanatsara ny fiveloman'ireo rafitra mpamokatra misehatra amin'ny ala sy ara-pambolena eto amintsika. Tetik'asa hifarana amin'ny taona 2025. Faritra efatra eto amin'ny nosy no iasany : amin'ny faritr'i Diana, Sofia, Analamanga, ary Atsinanana.