Namolavola mari-pamantarana Label Soa Far ho an'ireo Foibem-panofanana mivondrona ao aminy ny tambazotra FARMADA. Miisa 13 ny ivon-toerana efa nisitraka izany. Nitondra anjara biriky lehibe amin'ny fanatsaràna ny kalitaom-pampiofanana atolotra ny tanora sy ny tantsaha hanabe voa ny famokarana ara-pambolena sy ny eny ambanivohitra teto amintsika ny Tambazotra FARMADA. Marika entina manavaka ny ivon-toeram-panofanana, izay mitondra fanatsaràna sy manavao ny rafitra ao aminy ny Label Soa Far...
Natokana ho an'ireo ivon-toeram-panofanana manara-drafitra ary manolotra lasim-panofanana sy diplaoma mifanaraka amin'ny fahaiza-manao ity mari-pamantarana ity.
Misy ny dingana arahana amin'ny fahazoan'ny foibem-panofanana mivondrona ao amin'ny FARMADA ny Label Soa Far. Tsy maintsy manana ny fankatoavana hisokatra sy fankatoavana ny lasi-panofanana ilay Foibem-panofanana vao afaka misitraka ny Label Soa Far hoy Ramatoa Rahelisoa Bakoly Danielle, tompon'andraikitra ao amin'ny ministeran'ny fampianarana teknika sy fanofanana arak'asa.
Ivon-toerana 13 ao amin'ny Tambazotra FARMADA no efa notolorana sy nahazo ny Label Soa Far. Isan'izany ny ISTRCE, ivon-toerana ambony miorina any Fenoarivo-Atsinanana. Misy toe-tsaina takiana ho an'ny ivon-toerana aorian'ny fahazoana ny Label Soa Far hoy Ramatoa Rahelisoa Bakoly Danielle, lehiben'ny sampan-draharaha momba ny fenitra sy ny zava-bita ao amin'ny ministeran'ny fampianarana ara-teknika sy ny fanofanana arak'asa.
Ampiandrasana ny fisitrahana ny mari-pamantarana Label Soa Far ny foibem-panofanana miisa 26 ao amin'ny tambazotra FARMADA. Andalam-pametrahana izany ny tompon'andraikitra ankehitriny.
