Nanokana roa andro nikaonan-doha momba ny fijery tantsaha niompana amin'ny dingana fanohanana an'ireo tanora hisehatra amin'ny famokarana eny ambanivohitra ny tambazotra Sendikan'ny Orina Ambanivohitra na ny Réseau SOA.
Atrik'asa natao ny 26 sy ny 27 jolay 2022 teny Ilafy, Antananarivo-Avaradrano niadian-kevitra momba ny fahombiazana sy ny madilana mila hotentenona amin'ny tohana ataon'ny tambazotra SOA sy ny mpiara-miombon'antoka aminy amin'izay fanohanana ny tanora, indrindra fa ireo nahavita fihofanana amin'ny famokarana ara-pambolena sy ny eny ambanivohitra, izay niainga tamin'ny fanadihadiana natao.
Nandray anjara ny tantsaha mpitarika fikambanana ao amin'ny tambazotra SOA, ireo tanora niofana sy nahazo tohana amin'ny seha-pamokarana sy ireo nofanina ho tompon'andraikitra any amin'ny fikambanana atsy ho atsy, ny teknisiana, ireo mpisehatra amin'ny fampandrosoana. Nitondra fanazavana momba izay tohana amin'ny tanora izay koa ny tompon'andraikitra ao amin'ny ministeran'ny Fambolena sy ny Fiompiana.
Nomena sehatra misimisy kokoa momba ny fijeriny izay tohana ho azy ireo izay ny tanora nandritra ny roa andro. Mazava ny antony sy ny tanjona kendrena hoy ny filohan'ny Tambazotra SOA, Razafimbololona Angeline. Raha tsy ampiasaina ny fahalalana noratovina tamin'ny fiofanana dia zava-poana ihany no nanaovana izany hoy izy.
Nahafan'ireo tanora namosaka ny heviny amin'ny sehatr'asa ataony ny fikaonan-doha nokarakarain'ny tambazotra Sendikan'ny Orina Ambanivohitra na Réseau SOA. Nivoitra tamin'ny hevitra naroson'izy ireo ny fanatevenana ny fiofanana omena azy. Tsy ampy, mila ampiana ny enti-manana amin'ny fampandehanana ny tetik'asa aorian'ny fiofanana arahana hoy ireo tanora.
