Manohy ny sehatr'asa fampivoarana ny tanora tantsaha indrindra ireo tanora vehivavy eny amin'ny tontolo ambanivohitra ho lasa matihanina amin'ny seha-pihariana ataony ny tambazotra Sendikan'ny Orina Ambanivohitra na ny "réseau SOA". Miara-dalana amin'izany ny fampiofanana ny tanora ho lasa tompon'andraikitra eny amin'ny fikambanan'ny tantsaha.

Tetik'asa iarahan'ny tambazotra SOA amin'ny fandaharan'asa FANAINGA, tanterahana amin'ny faritra miisa roa dia ny eto Analamanga sy ny any Mahatsiatra-Ambony ity tetik'asa ity. Isan'ny sehatra iasan'ny tambazotra SOA moa ny fampivoarana ny tanora tantsaha amin'ny alalan'ny fampiofanana azy ireo ho lasa tompon'andraikitra eny amin'ny fikambanana tantsaha hoy Andriamatoa Rakotonirina Tovoniaina Jocel, tompon'andraikitra misahana ny tanora ao amin'ny tambazotra SOA.

Fikambanan'ny tantsaha manerana an'i Madagasikara ny tambazotra SOA. 23 ny fikambanamben'ny tantsaha mivondrona ao aminy ankehitriny, ivondronan'ny fianakaviana tantsaha 23.000 miparitaka amin'ny faritra miisa 11 eto amin'ny nosy. Manohana ireo fikambanan'ny tantsaha miaro ny zon'ny tantsaha sy ny famokarana tantanam-pianakaviana ny tambazotra SOA, mampiofana ireo mpikambana anatin'ny fikambanan'ny tantsaha indrindra ny tompon'andraikitra sy ny teknisiana ary ireo tanora. Mampiroborobo ny fikambanana amin'ny alalan'ny fanentanana sy  fampidirana mpikambana vaovao koa ny Tambazotra...

18 taona tamin'ny sehatr'asa fampandrosoana ny tontolo ambanivohitra ny Tambazotra SOA. An-jatony maro ireo tanora voahofana amin'ny sehatr'asa famokarana ary efa nahazo fanohanana nanomboka tamin'ny taona 2015 nanaovana izany sehatr'asa fampivoarana ny tanora izany.