Namerina indray ny fanentanana ny rehetra handalina ka hahatsapa ny maha zava-dehibe ny Sakramentan'ny Batemy i Papa François.

Andro vitsy mialoha ny 12 janoary, hanamarihana ny fahatsiarovana ny nanaovana Batemy an'i Jesoa dia nanamafy izay fanentanana izay indray ny Papa. Zahao, hoy izy, ny fahasoavana azo avy amin'io Sakramenta io ary aoka hahay hitondra izany amin'ny fiainana andavan'andro ny tsirairay. Isan'ny navoitrany tamin'ny fampianarana nandritra ny Audience Générale tao amin'ny efitrano Paoly faha-6 ao Vatican, ny alarobia 8 janoary teo, izany. Tokony ho tadidy, tahaka ny hahatsiarovana hatrany ny daty nahaterahana, hoy ny Papa, ny daty nandraisana ny Sakramentan'ny Batemy ka tsy ho hadinoina. Tokony ho tsaroana mandrakariva ka hisaorana an'Andriamanitra amin'ny fahasoavana entin'izany Batemy izany.