Ankalazaina isaky ny 12 desambra ny fetin'i Notre-Dame-de-Guadalupe. Nitarika ny Eokaristia Masina ho fanamarihana izany tao Vatican, omaly, i Papa François izay Papa latino-amerikanina voalohany.

Lasa toa ny fetim-pianakaviana ho an'ny ankohonampiainana latino-amerikanina ao Rome any Italie io fotoana niarahana tamin'i Papa François, nanamarika ny fetin'i Notre-Dame-de-Guadalupe omaly io. Navoitran'i Papa tamin'ny fampianarany nandrittra ny toriteniny ny maha-Reny an'i Masina Maria. Toriteny fohy sy tsy nomanina, nataony tamin'ny fiteny espagnole mba hahazoan'ireo latino-amerikanina ny fampianarana, tsy nilàna mpandikateny. Renintsika sy Renin'izao tontolo izao i Masina Maria, hoy izy. Ara-tantara, niseho tany Mexique tamin'ny taona 1531 i Masina Maria. Fisehoana izay nitarika sy nahatonga ny fanajan'ny kaontinanta amerikanina azy ka nametrahany azy ho mpiaro azy hatramin'izao.