Nitsidika ilay fampirantiana momba ny Tranonomby, tanterahina tsy lavitra an'i Vatican, i Papa François, ny tolakandron'ny alatsinainy teo.

Fampirantiana izay karakarain'ny filankevitra paontifikaly misahana ny fanelezana ny Vaovao Mahafaly sy ny masoivohon'i Hongrie eo anivon'ny Fiketrahana Masina. Nampitondraina ny anarana hoe: "Tranonomby zato" io fampirantiana io na dia miisa 130 avy amina firenena 30 aza ireo Tranonomby aseho ao. Nitsidika io fampirantiana io ny Papa ho fanehoany ny maha zava-dehibe ny fanarahina sy ny fanohizana ny fanaovana azy ara-pinoana; indrindra taorian'ilay nanaovany sonia ny taratasy apôstôlika tao Greccio, tamin'ny voalohan'ny volana desambra teo. Niarahaba sy nankasitraka tsirairay an'ireo mpampiranty sy ny fianakaviany avy i Papa François, nandritra io fitsidihana nataony io. Narahin'ny fitsiofandrano ny rehetra izany avy eo. Nosokafana tamin'ny 7 desambra teo moa, tsiahivina, ity fampirantiana momba ny Tranonomby ity ary tsy hifarana izany raha tsy ny 12 janoary 2020.