Nampahafantarin'ny sampana miandraikitra ny litorjia ao Vatican, omaly 7 janoary, ny fandaharam-potoanan'i Papa François hatramin'ny volana febroary.

Isan'ny hisongadina amin'izany ny hitarihany ny Eokaristia Masina any BARI, tanàna any atsimo atsinanan'Italie, amin'ny alahady 23 febroary, hamaranana ilay fihaonana antsoina hoe: "Méditerranée, frontière de paix", andraisan'irei Eveka manodidina ny faritra mediteraneana anjara. Mialoha izany anefa dia hitarika ny Eokaristia Masina hahatsiarovana ny nanaovana Batemy an'i Jesoa ao amin'ny Chapelle Sixtine i Papa François, ny alahady 12 janoary izao. Hisy zaza maromaro handray ny sakramentan'ny Batemy koa amin'io fotoana io. Hitarika ny famaranana ny herinandro fiaraha-mivavaka fiombonan'ny kristianina na ny firaisam-pinoana, andiany faha-23, ao amin'ny Bazilikan'i Saint-Paul-hors-les-Murs, izy ny harivan'ny sabotsy 25 janoary izao. Ny harivan'ny sabotsy voalohan'ny volana febroary kosa no hitarihany ny Lames ao amin'ny Bazilkan'i Masindahy Piera, hahatsiarovana ny nanalorana ny Tompo tao an-tempoly sy hanamarihana ny andro manerantany ho an'ny fiainana voatokana, andiany faha-24.