Miha mahazo vahana any LIBAN ankehitriny ny krizy arat-toekarena sy ara-politika.

Manoloana izany indrindra no nahatonga ny Kardinaly BECHARA BOUTROS RAÏ, patriarkan’i Antioches maronites nanao antso mba hisian’ny fiaraha-mientany rehetra amin’ny fanarenana ny firenena sy nampahafantatra ny fanohanan’ny Eglizy ny mponina. Ahitana  olona an-jatony manao fihetsiketsehana isan’andro any Liban ankehitriny. Hetsika maneho ny tsy fahaiza-mitantana ny krizy ara-toekarena lalovan’io firenena io. Tamin’ny herinandro teo, ohatra dia nitotongana ny sandan’ny vola ka efa nanakaiky ny 5 arivo livres ny 1 dolara. Nivory maika nandinika izany sy nitady vahaolana ny governemanta. Nambaran’ireo manam-pahefana fa efa mihoatra ny 50% ny fiakaran’ny vidim-piainana any Liban ho an’ity taona 2020 ity. Fotoan-tsarotra no lalovan’i LIBAN ankehitriny, hoy ny Kardinaly RAÏ, ary betsaka ny tokony atao hiatrehana izany eo amin’ny sehatra politika sy ara-toekarena ary ara-bola. Mahatoky hatrany ny fitantanana sy ny fiarovan’Andriamanitra anefa, hoy izy. Nambarany fa kristianina sy silamo ireo tanora mpanao fihetsiketsehana any Liban. Tsy mifankahalala izy ireo saingy mitovy ny fitakiany, satria, samy noana sy tsy manana asa ary tsy manana ny ho aviny izy ireo.