Manahy amin’ny mety hisian’ny resaka kolikoly ao anatin’ny ady amin’ny coronavirus ny eo anivon’ny Fiketrahana Masina.
Fanamarihana nentin’ny solontenan’i Vatican eo anivon’ny OSCE na ny « Organisation pour la Sécurité et le Coopération en Europe » izany, ny alatsinainy teo, nandritra ny « vidéoconférence » niarahany tamin’io sampan-draharaha misahana ny fiarovana sy ny fiarahamiasa amin’i Eraopa io. Mety hampirongatra ny kolikoly, hoy Monseigneur Janusz Urbanczyk, izay vanim-potoanan’ny valanaretina covid-19 izao. Vontoatin’io « vidéoconférence » io moa ny fanomanana ny andiany faha-28 amin’ny fikaonandoha ara-toekarena sy ara-tontolo iainanan’ny OSCE. Hita taratra ankehitriny, hoy izy, ny fisian’ny fiovàna samihafa eo amin’ny lafiny sosialy, toekarena sy tontolo iainana. Tsy azo lavina fa iray amin’ireo ratra goavana manimba ny fiarahamonina ny kolikoly, miteraka fahavoazana maro na eo amin’ny lafiny etika na ara-toakerana. Notsiahivin’io delegasion’ny Fiketrahana Masina io ny fanamarihana nataon’i Papa François nandritra ny fihaonany tamin’ireo mpiasan’ny « Cour des comptes » italiana tao Vatican, ny 18 marsa 2019. Nambarany tamin’izany fa mampihetry ny fahamendrehan’ny olombelona sy manimba ny tsara rehetra ny kolikoly. Manana andraikitra hiady amin’izany ny fiarahamonina manontolo.
