Ho feno zato taona amin’ny 18 Mai izao ny nahaterahan’i Karol WOJTYLA izay lasa Papa Joany Paoly faharoa ary efa olomasina ankehitriny.

Ho fanamarihana izany dia namoaka boky iray mirakitra lahatsoratra sy sary maro maneho ny tantaram-piainany ny « Librairie Editrice Vaticane » na ny LEV. Tantaram-piainany nanomboka tamin’ny nahavoafidy azy ho Papa tamin’ny 16 oktobra 1978 hatramin’ny nahaterahany any an-danitra na ny nahafatesany tamin’ny 2 avrily 2005, ahitana 128 pejy. Boky nampitondraina ny lohateny hoe : « Zato taona : Teny sy Sary ». Nofaritan’i Papa François amin’ny sasinteny manokatra io boky io ny lalan-tsarotra nodiavin’i Joany Paoly faharoa tamin’ny fiainany, indrindra tamin’ny fahatanorany izay namoizany ny fianakaviany sy ny fifikirany tanteraka tamin’ny finoana sy fahatokisana an’Andriamanitra ary ny naha-mpanabe ny tanora azy. Ankoatra ny teny italiana dia natonta amin’ny teny anglisy sy polonais ihany koa io boky io ka ny 18 Mai izao no hamoahana azy ofisialy.