Nampahafantarina tamin’ny 3 janoary lasa teo ny hafatr’i Papa François momba ny fankalazana ny andro erantany ho an’ny marary, andiany faha-28, marihina isaky ny 11 febroary.
Hafatra izay mifototra amin’ny fampianaran’i Jesoa Kristy manao hoe : « Mankanesa aty amiko ianareo izay mitondra fahoriana sy mavesatra entana fa hanamaivana anareo Aho » araka ny voasoratra ao amin’i Masindahy Matio. Maneho ny fiombonan’i Jesoa amin’ny olombelona mijaly sy mampalahelo io tenin’i Jesoa io, hoy ny Papa. Tsiahivin’i Papa amin’io hafatra io fa ny zo iaina no tena zo amin’ny mahaolona. Miseho amin’ny endriny maro ny fijaliana vokatry ny aretina, hoy ny Papa, ka anatin’izany matetika no hahatsapana ny fanaovana tsinontsinona ny mahaolona. Tena ilain’ny marary anatin’izany fijaliany izany anefa ny tambitamby sy ny fanehoam-pitiavana. Mila sitranina ny marary, hoy hatrany Papa François, saingy tsy tokony hadinoina koa ny fikarakarana azy mba hahazoany fahasitranana tanteraka amin’ny mahaolona.
