Nafahan'ireo mpaka an-keriny, tamin'ny sabotsy 18 janoary teo, ny iray tamin'ireo seminarista efa-dahy nalain'izy ireo tao amin'ny seminera zokiny ao Kaduna any avaratr'i Nigéria.
Nidiran'ny andian'olona mirongo fiadiana, tamin'ny alarobia 8 janoary teo, ny toerana misy ny seminera zokiny ao Kaduna any avaratr'i Nigéria. Niezaka namaly azy ireo ny iray tamin'izy efa-dahy ireo ka novonoin'ireo jiolahy saingy tsy matiny fa naratra mafy. Narian'ireo mpaka an-keriny teny amin'ny lalana io naratra io ka izao nisy nahita izao. Mpandalo nandeha moto no nahita ka nitondra azy tany amin'ny hôpitaly. Mbola tsaboina noho ireo ratra mafy nahazo azy moa izy io ankehitriny. Nivavaka ho an'ny fanafahana ireo seminarista telolahy namany moa ny pretra ao amin'ny arsidiosezin'i Kaduna. Marihina fa tsy fantatra mazava ny toerana itazonan'ireo mpaka an-keriny azy telolahy ireo hatramin'izao.
