Notendren'ny Papa François androany, ho Evekan'ny Diôsezin'Ambanja, i Mompera Donatien Francis Randriamalala, pretra avy amin'ny fikambanana Missionnaires de Notre-Dame de La Salette.

Teraka ny 6 janoary 1970, tao Antsirabe i Mgr Donatien. Tamin'ny taona 1992 izy no niditra tao amin'ny fikambanana Missionnaires de Notre-Dame de La Salette, rehefa avy nanaraka ny lalam-piofanana momba ny Lalana tao amin'ny Université Catholique de Madagascar. Nanohy ny fiofanana fandalinana ny filôzôfia, tao amin'ny Seminera Zokiny Masindahy Paoly Apôstôly ao Antsirabe, nanomboka ny taona 1995. Nandalina ny teôlôjia tao amin'ny Seminera Zokiny Masimbavy Terezin'i Jesoa Zazakely, ao Faliarivo Antananarivo, nanomboka ny taona 2000.

Nohamasinina ho pretra izy 19 aogositra 2003, ary voatendry hiandraikitra ny Distrika Misiônera Avaradarano, tao amin'ny Diôsezin'i Morondava, hatramin'ny taona 2006. Nanohy ny fianarana tany amin'ny Université Pontificale Salésienne ao Rôma, ka nahazo ny mari-pahaizana Licence momba ny pastôralin'ny tanora, ny taona 2010. Voatendry ho Vikera Jeneralin'ny Diôsezin'i Morondava tamin'ny taona 2010, sady Curé tao amin'ny Parosasy Notre-Dame de La Salette, hatramin'izao 11 nôvambra 2022, nanendren'ny Papa François azy ho Evekan'Ambanja izao.

Miarahaba ny Diôsezin'Ambanja, nahazo mpiandry ondry ny Ekipan'ny Radio Don Bosco, ary mirary soa ho an'i Mgr Donatien Francis Randriamalala, hahatontosa ny iraka ankinin'Andriamanitra sy ankinin'ny Eglizy aminy.