Notendren’ny Papa François ho Eveka’ny Diosezin’i Fenoarivo-Atsinanana i P. Mareck Ochlak, Lehiben’ny Fikambanana Oblats de Marie Immaculée, ao amin’ny Province Pologne amin’izao fotoana izao.
Teraka tao Nowe Miasto Lubawakie, Diosezin’i Torún ny 14 marsa 1966 i Mgr Mareck. Ny taona 1981 izy no niditra tao amin’ny Seminera zandrin’ny Fikambanana Missionnaires Oblats de Marie Immaculée tao Markowice. Rehefa nahazo ny mari-pahaizana Bakalorea izy ny taona 1985, dia niditra tao amin’ny dingam-piofanana novisia tao Koden, ka nanonona ny voady voalohany tao amin’io Fikambanana io ny 8 septambra 1986. Avy eo izy nanohy ny fandalinana filozofia sy teolojia tao amin’ny Semineran’ny Oblats tao Obra, ary tao izy no nanonona ny voady mandrakizay. I Mgr Zdzislaw, eveka mpanampy tao Poznan no nanamasina azy ho pretra ny 20 jona 1992.
Tany Kiedzierzyn-Kozle izy nanao asa misionera voalohany, ka voairaka ho vikera tao amin’ny Fiangonana Md Eugène de Mazenod. Ny 8 aogositra 1995 izy no nihazo an’i Madagasikara ka nitondra Fiangonana tany ambanivohitra sady Lehiben’ny ankohonam-piainan’ny Misionera Oblats tao amin’ny Arsidiosezin’i Toamasina. Izy no Lehiben’ny Délégation Oblats de Marie Immaculée teto Madagasikara ny taona 2009 ka hatramin’ny 2015. Rehefa tapitra io fotoam-piasany io dia nanohy ny asa maha misionera azy tany Befasy izy ny taona 2016 ka hatramin’ny 2021. Niverina tany Pologne izy avy eo, ary voatendry ho Directeur de la Procure ho an’ny Province Pologne.
Ny 20 janoary 2023, notendren’ny Lehiben’ny Fikambanana maneran-tany ho Lehiben’ny Province Pologne i P. Mareck, ka ny 17 febroary 2023 izy no nanomboka io asa io, izay marihana fa eo ambany fiadidiany ihany koa ny Délégation O.M.I eto Madagasikara. Ny 17 aprily 2025 izy no notendren’ny Papa François ho Eveka’ny Fenoarivo-Atsinanana.
Manoloana izao Fanendrena izao dia mirary soa an’i Mgr Marech ny Fivondronamben’ny Eveka eto Madagasikara ary miarahaba ny Diosezin’i Fenoarivo-Atsinanana amin’ny nahazoan’izy ireo Eveka, araka izao firarian-tsoa entin’i Mgr Marie Fabien Raharilamboniaina, Filohan’ny Fivondronamben’ny Eveka eto Madagasikara izao.
Ny Ekipan’ny Radio Don Bosco dia miarahaba an’i Mgr Mareck Ochlak, mirary soa azy hahavita be amin’ny iraka ankinina aminy, ary miarahaba ny Diosezy Fenoarivo-Atsinanana noho ny fahazoan’izy ireo mpiandry ondry vaovao.
