Isan'ireo sakafo mahavelona sy ara-pahasalamana ahitàna otrikaina sy mineraly betsaka araka ny voka-pikarohana natao ny "anantsinahy, anapatsa, anamamy-dia, ny angivy" sy ny sisa, sokajiana ho legioma-dia na legioma nentim-paharazana. Ahiana ho lany tamingana anefa izy ireny. Notrandrahana sy nomena lanja manokana ny fambolena azy ireny tamin'ny alalan'ilay tetik'asa DARWIN Initiative, tetik'asa mandritra ny telo taona hifarana amin'ny volana marsa 2022.

Nahomby ny tetik'asa amin'ny ankapobeny. Nanatsara ny fidiram-bolan'ireo vehivavy tantsaha any amin'ny faritra Vakinankaratra sy Itasy ny tetik'asa fampiroboroboana ny voly legioma nentim-paharazana. Misokatra ny lalam-barotra. Efa mirona mividy azy ankehitriny ny mpanjifa. Manatombo noho ny legioma novolena hatramin'izay ny vidin'ny legioma nentim-paharazana. Vehivavy tantsaha miisa 200 ao amin'ireo faritra iasan'ny tetik'asa DARWIN Initiative no nofanina hitahiry ny ambioka sy hamokatra ny legioma nentim-paharazana mba hatao sakafo sy hamidy.

Hanamafisana ny fanjarian-tsakafo eto Madagasikara sy dingana iray hahatongavana amin'ny fahavitan-tena ara-tsakafo ny fanatanterahana ny tetik'asa. Mamatsy vola ny tetik'asa moa ny DARWIN Initiative Fiaraha-miasa eo amin'ny fanjakàna malagasy, amin'ny alalan'ny Ministeran'ny Fambolena sy ny Fiompiana, ny Foibem-pirenena momba ny Fikarohana ampiharina amin'ny Fampandrosoana ny eny Ambanivohitra na ny FOFIFA, ny Oniversite Antananarivo amin'ny alalan'ny sampam-piofanana Siansa miaraka amin'ny Fanjakàna Britanika amin'ny alalan'ny Foibe eran-tany momba ny zava-maniry na ny World Vegetable Center, no mandrindra ny tetik'asa.