Misedra olana ny lalam-pihariana kabaro izay isan'ny ifotoran'ny tantsaha mivondrona ao amin'ny FITAME na ny Firaisantsoan'ny Tantsaha Menabe. Federasiôna misehatra amin'ny fampiroboroboana ny tontolo ambanivohitra any amin'ny Faritra Menabe iny moa ny FITAME.
Miisa 750 ny mpikambana ao amin'ny FITAME miparitaka any amin'ny fikambanana 60. Manana teny filamatra : Miofana, Mampihatra, Mizara. Ireo olona liana amin'ny fiofanana sy fandrosoana ara-pamokarana no mivondrona ao aminy. Mampihatra izany ary mizara izany koa avy eo.
Marolafy ny lalam-pihariana iantsorohan'ny FITAME, fa isan'ny tena mampiavaka azy ireo ny fiompiana tantely sy ny famokarana kabaro. Misehatra amin'ny fambolena legioma sy ny voamaina ary ny fambolena vary koa ny mpikambana ao aminy. Ny lalam-pihariana kabaro izay misedra olana tato ho ato noho ny fiovan'ny toetr'andro hoy Andriamatoa Rakotoarisoa Robel, mpandrindra FITAME.
Nahafahan'ny tantsaha mpikambana ao aminy nanatsara ny famokarany sy ny fidiram-bolany ny nananganana ny Firaisantsoan'ny Tantsaha Menabe. Hankalaza ny faha-20 taona nijoroany amin'ny taona ho avy ity fikambanam-paritry ny tantsaha any Menabe ity.
