Nahomby amin'ny ankapobeny ny Fandaharan'asa PLAE-IV eo ambany fiahian'ny Ministeran'ny Fambolena sy ny Fiompiana. Namatsy vola ny Fiaraha-miasa Alemana KFW sy ny Governemanta Malagasy. Fandaharan'asa nandritra ny 5 taona, niasa tamin'ny Faritra miisa 4 teto Madagasikara : Sofia, Amoron'i Mania, Matsiatra-Ambony ary Ihorombe...

 Fandaharan'asa natao iarovana ny fikahon'ny riaka ny nofon-tany, ny fambolen-kazo, ny fampivondronana ny mpamboly hazo ary ny fampisitrahana ny tantsaha ny zon'izy ireo amin'ny fananan-tany ny PLAE-IV. Ny fitantanana maharitra ny harena voajanahary sy ny fampiroboroboana ny famokarana ny eny ambanivohitra no tanjona nokendrena...

Fokontany miisa 197 avy amin'ny Kaominina miisa 35 no nisitraka ny Fandaharan'asa tany amin'ireo Faritra niasany. 4600 ireo tokantrano no nisitraka izany. 7700 Ha no veleran-tany voavoly hazo nambolena raha 6000 Ha no tanjona. 1600 Ha no tany fambolena voaaro amin'ny fikahon'ny riaka raha 1430 Ha no tokony notratrarina... 48% amin'ireo tany ireo no efa nahazo kara-tany. 3000 amin'ny 5000 isa ny kara-tany no voazara. 207 ny fikambanana voatsangana raha 150 no vinavina...

Nanatsara ny fari-piainan'ireo tantsaha ihany koa ny fisian'ny Fandaharan'asa. Maro ny tantsaha nahazo traikefa amin'ny fiarovana ny tany famokarany. Nitombo ny fandriam-pahalemana noho ny fanamorana ny fisitrahana kara-tany ary nanova toe-tsaina satria mavitritra amin'ny fambolen-kazo ny olona... Nofaranana tamin'ny fomba ôfisialy ny 06 septambra 2022 tao Fianarantsoa ny Fandaharan'asa PLAE-IV...