Nivahiny teto Madagasikara nanomboka ny 25 jona teo hatramin'ny 3 jolay lasa teo ny tale jeneralin'ny Africa-Rice na ny Foiben'ny Vary aty Afrika, Dokotera Harold Roy Macaulay. Izy izay sady talem-paritra ho an'ny Afrika atsinanana eo anivon'ny vondron'ny fakan-kevitra ho an'ny fikarohana ara-pambolena iraisam-pirenena na ny CGIAR...

Anton-diany ny nanamafy orina ny fiaraha-miasan'ireo vondrona roa ireo amin'i Madagasikara amin'ny seha-pamokarana eto amintsika. Nanolotra masomboly vary fototra 8 taonina ho an'i Madagasikara àry ny Africa-Rice na ny Foiben'ny Vary aty Afrika, isan'izany ny Nerica 4 (quatre) sy ny Arica 4. Ny tale jeneraliny dokotera Harold Roy Macaulay no nanolotra izany ny voalohan'ny volana jolay lasa teo teny Anosy niaraka tamin'ireo mpiara-miasa aminy, rehefa avy nitsidika ara-pomba fanajàna ny ministry ny fambolena sy ny fiompiana ny alatsinainy 27 jona 2022.

Nasehon'ny Africa-Rice nandritra ny fanolorana ny masomboly fototra ihany koa ny fotsim-bary azo avy amin'ny fikarakarana manokana manana kalitao tsara, dia ny riz étuvé na vary arahana, tombotsoa maro no azo avy aminy hoy ny ministra Ramilison Harifidy.

Niara-niasa amin'ny tantsaha ary misehatra amin'ny fanohanana ny voly vary eto amintsika amin'ny alalan'ny fampiharana ireo voka-pikarohana samihafa ny Africa-Rice izay. Isan'izany ny tohana nataon'izy ireo tao amin'ny tendro fampandrosoana ny voly vary tao Vakinakaratra, Ambohibary-Sambaina sy Ankazomirihotra ary ny tany amin'iny lemak'i Bas-Mangoky iny.