Tanora efatra hetsy isan-taona no tonga eo amin'ny tsenan'ny asa, eto Madagasikara, araka ny tarehimarika misy. Tsy afaka mandray azy ireo anefa ny orinasa misy eto amintsika noho ny tontolo ara-toekarena. Ny sehatr'asa eny ambanivohitra no mamaha olana amin'izay tsy fahampian'ny asa atolotra izany. Mitaky fahaiza-mamokatra izany, tsy ho tratra raha tsy amin'ny alalan'ny fiofanana.

Mitondra ny anjara birikiny amin'izay fanatsarana ny fampiofanana izay ny tambazotran'ireo ivon-toerana misahana ny fanofanana ara-pamokarana eny ambanivohitra na ny FARMADA. Rafitra ivondronan'ireo ivon-toerana efa ho zato mahery.

Ivon-toerana misahana ny fanofanana ara-pamokarana eny ambanivohitra am-polony no hisitraka tombontsoa mivantana amin'ny fanatsarana ny kalitaon'ny fanofanana ; ary tantsaha dimy alina mahery no homena lanja manokana ny traik'efa ananany. Ireo no vokatra andrasana amin'ny fiaraha-miasa eo amin'ny Minisiteran'ny Fampianarana Teknika sy ny Fanofanana arak'asa sy ny tambazotra FARMADA. Nanamafy ny fiaraha-miasa efa nisy, hanatsarana ny kalitaon'ny fanofana ara-pamokarana eny ambanivohitra eto amintsika ny andaniny sy ny ankilany. Niara-nanao sonia ny fifanarahana momba izany, ny 12 avrily 2022, ny Minisitra Vavitsara Rahantaniriana Gabriela sy ny Filoha Nasionalin'ny FARMADA, Serge Merison.

Nambaran-dRamatoa Minisitra fa tombontsoan'ny tanora sy ny mpamokatra eny ambanivohitra ny fifanarahana natao, hisy ny lasim-panofanana iombonana ho an'ny ivon-toerana, izay hankatoavin'ny Minsitera.