Alatsinainy 29 novambra 2021 — Herinandro voalohany amin'ny Fiavian'ny Tompo — Ny Tompo no mpitsara antsika, ny Tompo no Mpanjakantsika. Izy no hamonjy antsika — Evanjely Masina nosoratan'i Masindahy Matio 8, 5-11

Miaramila rômana no miangavy an’i Jesoa mba hanasitrana ny ankizilahiny. Entina hilazana fa tsy ho an’ny Jody ihany ny famonjena fa ho an’ny firenena rehetra. Fanampiny izay indray, miaramila rômana, ilay mpanjanaka an’i Israely. Koa raha Mesia hanafaka an’i Israely i Jesoa , nahoana no nanaiky ny fiangavian’ity miaramila rômana ity ? Etsy ankilany, tsy mety amin’ny Jody no miditra any an-tranon’ny hafa firenena, heverina ho mampaloto ny miditra any an-tranon’ny tsy mpino, indrindra eo amin’ny lafiny ara-pivavahana. Mahalala izany ity kapiteny ity ka niangavy an’i Jesoa tsy hoe hiditra ao an-tokantranony fa hanonona teny iray ihany dia ho sitrana ny akizilahiny. Noderain’i Jesoa ny finoana nananany ary mbola nisintonany fampianarana indray aza izany finoana lalina izany ka nahaloa-bava Azy nanao hoe "Tsy mbola nahita finoana toy izany Aho tamin’ny zanak’Israely".

Eto koa no hahatsapana fa ny vavaka atao aminy dia misy vokany mandrakariva rehefa atao am-pinoana. Tsy tafahaona mivantana tamin’ilay marary i Jesoa kanefa dia sitrana soa aman-tsara izy noho ny fitalahoana nataon’ilay Kapiteny tamin’i Jesoa. Manomboka izao vanim-potoana ny Fiaviana izao isika. Fotoana lehibe handalinana ny finoana ; dia ilay finoana mahaova ny fiainana. Hanana finoana toa ity Kapiteny ity satria efa novahan’Andriamanitra ho an’ny Firenena rehetra ny famonjena. Vanim-potoana hamelombelomana indray ny fanantenana izao, hiandrasantsika ny Mpamonjy hanasitrana antsika amin’ny fahotana. Vanim-potoana hifampivavahana ihany koa ka mba hiantefa amin’ny hafa ny famonjena, amin’ireo mbola tsy mahalala an’Andriamanitra, ireo malaina mivavaka kanefa efa zanak’Andriamanitra vita Batemy ; toa ilay ankizilahy nangatahan’ilay Kapiteny ho sitranin’i Jesoa. Amen !