Zoma 9 jolay 2021 — Herinandro fahefatra ambin'ny folo mandavantaona — Hamirapiratra tahaka ny fahazavan’izao tontolo izao ianao, raha mitana ny tenin’ny fahamarinana — Evanjely Masina nosoratan'i Masindahy Matio 10, 16-23

Ry kristianina havana, mitohy ihany ny hafatrafatr’i Jesoa amin’ireto Apostoly hirahiny.

Tontolo sarotra ilay handehanana ka mila fahamalinana. Tsy afenin’i Jesoa amin’izy ireo ny miandry azy ; toy zanak’ondry marefo, tsy afaka miaro tena kanefa eo afovoan’ny amboadia masiaka sy mahery setra. Amin’ny alalan’ny halemem-panahy no hanjakan’Andrimanitra. Ny madinika sy ny marefo no fidin’Andriamanitra hihariharian’ny voninahiny.

Aoka ho tsotra toy voromahailala, hoy ny Tompo, nefa koa ho malina toy ny bibilava : tsy mifaninana amin’izao tontolo izao hampiseho hery na hamitaka fa ho tsotra sy manetry tena kanefa tsy manaiky hambakaina, tsy hitady tomobon-tsoa ho an’ny tena fa hiasa ho an’Andriamanitra.

Ny toetra manaraka takiana dia ny fitokiana tanteraka an’Andriamanitra. Tsy afenin’i Jesoa ny fahasarotan’ny iraka, fa omeny toky koa anefa fa hanana hery anaty dia ny Fanahy Masina. Ho halan’ny olona, ho henjahina, hotoriana aza. Ny fitokisana an’Andriamanitra no hery, ny fahatokiana sy ny faharetana tsy hivadika hatramin’ny farany no antoka. Mahereza miatrika isika fa Andriamanitra no tompon’ny teny farany. Amen.