Zoma 16 avrily 2021 — Herinandro faharoa fankalazana ny Paka — Ny ondriko mandre ny feoko, hoy ny Tompo fantatro izy ary manaraka Ahy — Evanjely Masina nosoratan'i Masindahy Joany 6, 1-15
Nahita vahoaka be nanatona Azy i Jesoa ka nanontany an’i Filipo mpianany nanao hoe “Aiza no hividianatsika mofo ho azy ireo?”. Azo lazaina fa fantatr’i Jesoa ny ataony hanome mofo ho an’ireo vahoaka be ireo. Eto anefa very hevitra ny mpianatra : vola ohatrinona no ho laniana ? Ka mofo denie roanjato aza tsy ahazoan’ny olona sombiny iray akory. Manam-petra isika olombelona, manampetra ny fahatakaran’ny saintsika, hany tonga olona lehibe ny fahabetsahan’ny vahoaka tonga teo tsy maintsy omena sakafo. Soa ihany fa i Andre nahatsikaritra fa misy zazalahy mitondra mofo ôrja dimy sy hazandrano roa ao.
Miainga amin’ireo kely eo am-pelatanana ireo i Jesoa, niandrandra ny Lanitra, nisaotra an’Andriamanitra, ary Izy mihitsy no lasa nizara ny mofo sy ny hazandrano tamin’ny vahoaka teo, ary voalazan’ny Evanjely fa nampanaranany fo mihitsy ireo vahoakaka nihinana. Eto no ahatsapana fa tonga teto an-tany Izy tsy ho tompoina fa tonga mba hanompo. Tsy nahagaga raha nitady hanangana Azy ho mpanjaka ireto vahoaka ireto, satria nahafaka hanoanana azy ireo Izy.
Tsy mila voatsiary amintsika Andriamanitra fa mampitombo izay eo am-pelatanantsika mba hifampizarana amin’ny hafa. Ny angatahiny dia ny fahafoizantsika eo amin’ny fiainana. Eto no ahafahantsika mandinika fa ny mofo teo ampelatanan’i Jesoa no mahavoky antsika. Tandindon’ny Eokaristia ity fampitomboana ny mofo ataon’i Jesoa ity. Fa i Jesoa mihitsy no Mofo velona nidina avy any an-danitra, hanome ny fiainana ho an’izay mihinana Azy. Mizara hasambarana ho antsika Izy ary manalefaka ny hanoanana mahazo antsika, dia ilay hanoanana ara-panahy. Hanoanana ny fiainana sambatra sy mandrakizay.
Izy no Teny tonga Nofo ary tonga mofo eo ambony ôtely masina. Sakafom-panahy ho antsika koa ny Tenin’Andriamanitra izay atolotry ny Fiangonana hohenointsika rehefa mankalaza ny Eôkaristia, ary hifampizarantsika amin’ny toriteniny. Mamelona antsika isan’andro amin’ny Teniny sy ny Tenany i Jesoa hahatanteraka ny vavaka ataontsika manao hoe : “Omeo anay anio ny hanina hohaninay isan’andro”. Amen !
