Alatsinainy 06 janoary 2020 — Herinandro manaraka ny Epifania — Evanjely Masina nosoratan'i Masindahy Matio 4, 12-17. 23-25 — Ny olona izay nitoetra tao amin'ny maizina dia nahita fahazavana lehibe, ary ireo izay nitoetra tao amin'ny aloky ny fahafatesana no niposahan'ny mazava.
Manome endrika na famantarana na seho maromaro isehoan'i Kristy ny Fiangonana. Ny fifindran'i Jesoa toerana nambaran'i Masindahy Matio eto dia mampiseho na manambara an'i Kristy ho iraka, misiônera. Nitondra fahazavana ho an'ireo izay mbola tao anatin'ny maizina ary miainga amin'izay fifindrany toerana izay no itoriany sy ampianarany ny Vaovao Mahafaly na ny Evanjelin'ny fanjakan'Andriamanitra.
Endrika isehoan'i Kristy koa eto ny fanasitranany ny aretina maro mba hanambarana fa tonga hamonjy ny olombelona rehetra Izy. Tsy mipetrapetra-poana fotsiny Izy fa tena miasa. Izay mety ho fahoriana manjo ny olona dia sitraniny sy avotany avokoa. Izay fihetsika hanehoan'i Kristy ny heriny sy ny fahefany izany no manambara fa Izy tokoa no fahazavan'izao tontolo izao. Koa meteza isika tsy ho maizina am-pototry ny jiro fa hanaraka an'i Kristy tahaka ireto vahoaka avy tany Galilea, Dekapôly, Jerosalema, Jodea mba hanakaiky hanara an'i Kristy Ilay Mpamonjy, fahazavana hanala ny haizina ao anatintsika
