Alahady 08 nôvambra 2020 — Alahady faha-32 mandavantaona — Evanjely Masina nosoratan'i Masindahy Matio 25, 1-13 — Miambena sy mivonòna ianareo fa ho avy amin’ny ora tsy ampoizinareo ny Zanak’Olona.
Ry kristianina havana ! Ankatoky ny faran’ny taona litorjika isika, koa miompana amin’ny farandro na ny fahataperan’izao tontolo izao koa ny fanentanan’ny Tenin’Andriamanitra amintsika. Fanoharana no entin’i Jesoa mampiomana antsika ho vonona amin’izany ; indrindra ho vonona hitsena ny Tompo amin’ny andro hiverenany. Fampianarana mahakasika ny amin’ny faran’izao tontolo izao ka hiverenan’ny Tompo moa ity momba ny virjiny adala sy virjiny hendry ity. Roa no tanjona kendren’i Jesoa amin’io fanoharana io : voalohany dia mamelona fanantenana ho antsika fa mbola hiverina ny Tompo na dia tsy fantatra aza ny fotoana, ny faharoa dia manoro antsika ny tokony hatao, ny toetra sy ny fiomanana eo am-piandrasana sy fandraisana izany fahatongavany izany. Matetika tokoa manko isika no manadino ny tokony hatao eo amin’izany fiandrasana izany ka tsy manao ireo adidy maha kristianina antsika, tsy manatanteraka ny andraikitra maha iraka antsika noho ny batemy noraisintsika, manjehy ny andro ho lava ka mangataka andro ka tsy mitsinjo ny farany. Aza adinoina fa misy farany ny zavatra rehetra ataontsika. Ny tena zava-dehibe izany dia ny fahavononana mandrakariva. Fitenintsika ny hoe lehilahy izay mahafaka ny tampoka kanefa aoka ho tsapa tsy misy ohatra ny manana ny vonona sy ny vonona mandrakariva amin’izay rehetra atao sy miandry.
Ny mahakasika ny hoe maha adala na ny maha hendry kosa indray dia tsy toy ilay any amin’ny fiainana andavanandro fahitantsika any. Ny adala tian’i Jesoa faritana eto dia ireo tsy mba malina, ireo tsy mba miomana, ireo manjehy ny andro ho lava ary ireo tsy mitsinjo ny farany. Ny hendry kosa dia mitovy amin’ireo efa noharin’i Jesoa amin’ny lehilahy hendry nanorina ny tranony teo ambony vatolampy. Izany hoe, ireo manorina ny fiainany amin’ny Tenin’Andriamanitra, ireo mampifanaraka ny fiainany amin’ny fampianarana hitarihan’ny Eglizy azy, ireo miaina ny sakramenta noraisiny : izany no solika fiandry, ary fiomanana tsara atao mba ho vonona mandrakariva. Mazava àry ny tenin’i Kristy fa tsy fantatra ny andro ka aoka isika ho vonona mandrakariva. Miorena amin’ny finoana ary hiaino io finoana io fa io no solika mampaharitra ny jirontsika mirehitra foana mandram-pahatongan’ny Tompo miverina ka hitsenantsika Azy.
