Alakamisy 17 septambra 2020 — Herinandro faha-24 mandavantaona — Evanjely Masina nosoratan'i Masindahy Lioka 7, 36-50 — Andriamanitra no nampihavana an’izao tontolo izao indray tamin’ny alalan’i Kristy sy nametraka indray ny teny fampanantenana tamintsika.
Intelo miantoana no marihin'i Masindahy Lioka ao amin'ny Evanjely nosoratany ny fanasan'ny Farisianina an'i Jesoa hiara-hisakafo aminy — ity toko 7, 36 ity sy ny 11, 37 ary ny 14, 1 — ka samy nekeny avokoa ary nanehoany ny maha Mpamidra fo sy Manam-pahefana Azy, ary indrindra ny maha Mpamonjy Mpanasitrana Azy, na dia andro sabata aza. Ity toko 7, 36-50 vao nohenointsika teo ity izao no maneho fa Mpamindra fo, Mpamela heloka Izy na dia mpanota be aza ity vehivavy nikasika Azy ity.
Marina fa izay no maha izy Azy an'i Kristy, kanefa eo koa ny fihetsika nasehon'ity vehivavy ity, indrindra ny finoana nananany. Ny fitiavana nasehony an'i Kristy no nahazoany famindram-po ary ny famindram-po nataon'i Kristy taminy no nanamafy ny finoany sy ny fahatokisany an'i Kristy : "L'amour provoque le pardon, et le pardon provoque l'amour : plus on est pardonné, plus on est porté à aimer", hoy ny mpandinika iray. Ny fitiavana tokoa manarona ny fahotana maro, anisan'ny fampianarana ampitain'i Kristy amin'ity Farisianina nanasa Azy ity izany eto, ary ampitainy amintsika mpihaino sy mpanara-dia Azy koa ; tsy ilaina ny mihatsara vela-tsihy fa ny fanehoanao ny maha ianao anao eo anatrehany no takiany, tahaka ny nataon'ity vehivavy ity. Isika tsirairay avy ihany koa, afaka manasa an'i Kristy ho ao an-tokantranontsika, indrindra ho ao anatintsika, ary afaka mamboraka ny fiainantsika aminy mba ahazoantsika famindram-po ombam-pitiavana avy aminy.
