Alarobia 12 aogositra 2020 — Herinandro faha-19 mandavantaona — Evanjely Masina nosoratan'i Masindahy Matio 18, 15-20 — Ny Rain’i Jesoa Kristy Tompontsika no nampahiratra ny masom-panahintsika mba hahalalantsika ny fanantenana izay niantsoana antsika.
Misy toe-pahazarana raiki-tampisaka ao an-tsain'ny olona matetika eny amin'ny fiainana eny, dia ilay mati-kenamaso na mijery tavan'olona. Izay ilay fiaraha-monin'olombelona satria vitan'ny azafady fiainana ary dia tamoraina eny foana. Ny vahaolana mahomby naroson'i Kristy androany dia hoe : "Raha diso taminao ny rahalahinao, manatona azy ary asehoy azy ny hadisoany". Ny rahalahy dia ny namana akaiky, ny mpiara-miasa, ny mpiara-mianatra, ny mpiara-monina... Endriky ny fifanampiana ny fifanitsiana atao am-pitiavana, satria tsy misy izay olombelona tsy ho diso. Amin'ny maha olombelona dia tsy anjely, ary tsy Andriamanitra ka ho tonga lafatra.
Ny fepetra dia hoe, mba manaiky ahitsy rehefa misy zavatra tsy nety natao ka nahadiso teo anatrehan'Andriamanitra sy teo anatrehan'ny fiaraha-monina. Tadidio tsara fa matoa misy manitsy, misy manoro, misy mananatra, dia aza raisina ho fankahalana be fahatany fotsiny izany, fa mariky ny fitiavana, satria ny hendry ihany, hono, no hanarina. Ny fepetra faharoa, raha mahita zavatra tsy mety ataon'ny namana, dia sahia miteny, aza mijery harina an-tava ary aza manao vain-drahalahy tsy maharary, satria hoy i Kristy hoe : "Raha mihaino anao izy, dia efa azonao ny namanao". Ny fanitsiana sy ny fanoroana ny hafa, amin'izay tsy mety ataony, dia efa endriky ny fitiavana ny namana tahaka ny tena. Ry Jesoa Tomponay, tsy misy izay tsy ho diso eo amin'ny fiainana, satria amin'ny maha olombelona dia tsy lavorary. Izay vonona hivoa famindra no akasitrahanao, koa ampio izahay tsirairay avy hahay hifanampy hifampitondra toy ny mpiray tampo. Amen.
