Alarobia 13 mey 2020 — Herinandro fahadimy amin'ny Paka — Evanjely Masina nosoratan'i Masindahy Joany 15, 1-8 — Ny ondriko mihaino ny feoko, hoy ny Tompo. Izaho mahalala azy, ary izy manaraka Ahy.

Ny fanoharana momba ny foto-boaloboka moa ao amin’ny Baiboly, indrindra ao amin’ny Evanjely dia efa lovan-tsofina entina hanambarana ny fitiavan’Andriamanitra ny vahoakany, ka eto i Kristy dia milaza ny tenany ho foto-boaloboka, izany hoe tena “Irak’Andriamanitra” - “Vahoakan’Andriamanitra” ary manantena ireo mpianany mba hitoetra sy hamoa ao Aminy.

Ny firaiketana amin’i Kristy fototra tokoa no mahavelona ny mpianany, ny kristianina, satria raha tsy i Kristy, tsy misy kristianina, koa marina sady rariny ny hanentanany ny mpianany mba hitoetra ao Aminy mba hampahavelona sy hampamokatra azy. Fanoharana ihany ny foto-boaloboka sy ny sampany fa isika mihitsy no tian’i Kristy hifikitra Aminy, ka anisan’ny hanehoana izany fiombonana Aminy ao amin’ny Eokaristia sy ny fandraisana ny teniny ary ny fiainana azy mba hampahavokatra ny finoana efa ananatsika. Izay tsy mino sy tsy mifikitra Aminy tokoa mantsy dia efa voarantsana ka misaraka Aminy sahady ary tsy mamokatra na inona na inona. Koa tadidio àry ilay tenin’i Md Paoly hoe “Rantsambatan’i Kristy avokoa isika !”.