19 avrily 2025 — Sabotsy Masina — Fiaretan-tory ankalazana ny Fitsanganan'i Jesoa Kristy— Evanjely Masina nosoratan’i Masindahy Lioka (Lk. 24, 1-12)

Paka, velona i Kristy resy ny fahafatesana, resy ny ratsy, Aleloloia. Izany fahaliana izany no hirariana hanenika fon’ny tsirairay, izany hafaliana izany no hiarariana ho an’ny isam-baravaravana. Saingy toy ireo vehivavy mankany amin’ny fasana dia miantefa amintsika koa ity fanotaniana ity : Nahoana no ety amin’ny maty no hitadiavanareo ny velona? Izany hoe tsy afaka higoka tanteraka ny fandresen’i Kristy isika raha mbola any amin’ny toerana aloky ny fahafatesana no hitadiavantsika ilay Tompon’ny aina. Ny toerana maimbo fahafatesana dia ny fahotana isan-karazany, toerana maimbo fahafatesana toy ny fialonana, ny fankahalana, ny hakamoana, toerana maimbo hakiviana, toe-tsaina tsy te hivoatra, toe-tsaina tsy te handray andraikitra. Mila vohaina ny varavaram-pasana dia ilay vato be mampijanona anaty alahelo satria efa tsy ao intsony izy fa efa nitsangan-ko velona.

Ny fiainana ny Paka dia tsy ilay lamesa fankalazana any am-piangonana ihany fa ny fampanjakana an’i Kristy amin’ny fiainana isan’andro mba anafahany anao amin’ny ratsy sy ny fahafatesana. Velona i Kristy ary te hitondra anao ho amin’ny fahavelomana. Mitaky fandraisana andraikitra aminao anefa izany. Asehoy ho hitan’ny olona fa manana an’i Jesoa Kristy nitsangan-ko velona, aoka ny hatsaranao na anaty na ivelany hitory izany fitsanganan-ko velona izany. Aoka ny finoana ny fitsanganan-ko velona hipaka amin’ny fiainana andavanandro mba tsy ho lasa kobaka am-bava. Meteza ho velona miaraka amin’i Kristy. Meteza hiala amin’ny fasana misy anao! Aoka hamiratra hazavana ianao!