22 nôvambra 2024 — Zoma, Herinandro Tsotra fahatelo amby telopolo Mandavantaona— Ankalazao ny Tompo, ry Jerosalema. Izy Ilay mandefa ny didiny eto an-tany — Evanjely Masina nosoratan’i Masindahy Lioka (Lk. 19, 45-48)

 Tonga ao Jerosalema i Jesoa ary miditra ao an-Tempoly, ilay toerana fihaonana amin’Andriamanitra, ilay fonenan’Andriamanitra. Nodioviny ny Tempoly: noroahiny ny mpivarotra rehetra tao. Ny tsara ho fantatra aloha dia biby fanolotra ho sorona ho an’ireo vahoaka avy lavitra tonga hanolotra sorona ao ireo biby namidy tao, ary vola atakalo handoavana ny hetran’ny Tempoly izay voadidy haloan’ny olona rehetra ireo mpanakalo vola ireo. Ny olana voalohany eto dia manararaotra maka tombony be ny sasany, ary lasa ilay fombafomba ivelany manolotra sorona no mibahan-toerana fa tsy tena fitiavam-bavaka amin’ny fo. Io no nahitsin’i Jesoa ka naveriny amin’ny laoniny ny maha Tempoly azy dia ny fampianarana sy ny fandinihana ny Tenin’Andriamanitra ka nahavory olona, nahavondrona vahoaka maro nihaino. Vahoaka izay efa fambara mialoha ilay vahoakan’Andriamanitra, Israely vaovao dia ny Eglizy.

Ho antsika ankehitriny: antitranterina io fanajana ny Tranon’Andriamanitra io, ny fahadiovana, ny fandehanana matetika ao, ny fikarakarana, ny fanitsiana ny fiainana hifanaraka amin’ny fampianaran’ny Evanjely. Samy tompon’andraikitra amin’izany ka aoka tsy hialangalana rehefa antsoina manadio sy mandravaka ny trano fiangonana. Fa ambonin’izany dia ny tenantsika mihitsy aloha no tempolin’ny Fanahy Masina, tempolin’Andriamanitra nanomboka tamin’ny batemy, ka io tenantsika io no tsy maintsy karakaraina voalohany, fenoina an’Andriamanitra, haingoina hatsaram-panahy satria olona manana finoana sy fitiavana no mivondrona ho vahoakan’ Andriamanitra. Amen.