26 septambra 2024 — Alakamisy, Herinandro Tsotra fahadimy amby roapolo Mandavantaona — I Jesoa Kristy Mpamonjy antsika no nanafoana ny fahafatesana sy nanambara ny fiainana amin’ny Evanjely — Evanjely Masina nosoratan’i Masindahy Lioka (Lk. 9, 7-9)

Nanaitra an’i Heroda mpanjaka ny lazan’i Jesoa Kristy tao amin’ny tanàna nanjakany. Liana dia liana izy amin’ireo tantaran’olona mahakasika an’i Jesoa ary naniry fatratra ny hahita Azy. Dingam-pinoana mila ataontsika kristianina avokoa io nataon’i Heroda io: liana mandrakariva mahakasika ny tantaran’i Jesoa ary maniry fatratra ny hihaona aminy ao amin’ny Teniny sy ao amin’ireo Sakramenta (Fampihavanana sy Eokaristia), maniry ny hihaona aminy amin’ny hafa indrindra ireo mahantra.

Tsy tomombana anefa io dingam-pinoana io raha tsy miafara amin’ny fiekena an’i Kristy ho Tompo, ilay Mesia sady Zanak’Andriamanitra. dingana miafara amin’ny fihainoana ny hafany sy fanatanterahana Azy ary amin’ny alalan’ny fanarahan-dia Azy. Indrisy anefa fa tsy nanao an’io dingana io velively i Heroda sy izay rehetra haka tahaka an’ity mpanjaka ity satria fahalalana nilainy hamonoany an’i Jesoa Kristy izany; fahalalana notadiaviny fatratra homeny an’i Pilaty ahafahana mamono an’i Jesoa, nampihena ny lazany sy nampietry ny voninahiny teo amin’ny tany sy ny fanjakana niadidiany.