7 septambra 2024 — Sabotsy, Herinandro Tsotra faharoa amby roapolo Mandavantaona — Asehoy ahy, ry Tompo ny lalanao, ary tariho amin’ny lala-mahitsy aho — Evanjely Masina nosoratan’i Masindahy Lioka (Lk. 6, 1-5)

Ry havana; ady hevitra miverimberina ny resaka sabata, andro fitsaharana satria rarana ny miasa, na ny lanjan’ny entana azo entina sy ny halaviran-dalana azo aleha aza dia voafetra. Nandalo tanimbary i Jesoa sy ny mpianany, dia naka salohim-bary ireto ka nikosoka izany dia nihinana. Voararan’ny lalàna izany, hoy ny mpanora-dalàna sy farisianina, satria mitovy amin’ny mijinja vary ihany. Tsy hoe fitia te handika lalàna ny an’i Jesoa fa te hanavao fomba fiaina; tsy ny lalàna akory no tanjona fa ny famonjena.

Naka ny tantaran’i Davida mpanjaka (1 Samoela 21,1-7) i Jesoa entiny nanazavana izany. Rehefa voatohintohina ny aina dia tsy maintsy ampandeferina aloha ny lalàna. Noana i Davida nefa avy nandeha lavitra dia nihinana ny mofo voahasina satria ny aina no ambony. Mofo voahasina voatokana ho an’ny mpisorona tsy azon’olon-drehetra hanina aza nohanina rehefa noana, mainka fa ny vary tsotra eny an-tsaha foto-tsakafo. Hajaina ny maha andro fitsaharana ny sabata fa azo atao tsara mihitsy ny mikarakara ny momba ny tena, ny sakafo, ny fahadiovana, ny fanaovana asa soa sy famonjena. Tsy ny lalàna manko no tanjona fa ny aina, ny famonjena. Androm-pamonjena ny andron’ny Tompo.

Any amin’ny andininy hafa any i Jesoa dia milaza hoe tsy tonga handrava ny lalàna fa hanatanteraka. Ka ilay manatanteraka dia mitondra fanazavana, manitsy izay nadika vilana, manentina izay madilana ary manazava ny hevitr’Andriamanitra ao anatin’ireny lalàna ireny. Ary ilay maha Zanak’olona an’i Jesoa dia manambara ilay fahefana ananany sy maha Tompo azy, Tompon’ny sabata, Tompon’ny lalàna. Aoka ho sarotiny amin’ny fanajana ny andron’ny Tompo isika fa i Jesoa no manome ohatra. Satria santarina eto an-tany ny lanitra. Amen.