20 jona 2024 — Alakamisy, Herinandro Tsotra faharaika ambin'ny folo Mandavantaona — Efa nataoko hoe sakaiza ianareo, hoy ny Tompo, satria efa nambarako taminareo avokoa izay rehetra reko tamin’ny Ray — Evanjely Masina nosoratan’i Masindahy Matio (Mt. 6, 7-15)
Ry kristianina havana; vavaka nampianarin’ny Tompo no ambaran’ny Evanjely amintsika. Ampianarin’i Jesoa ny toe-panahy enti-mivavaka sy ny vavaka atao. Mampihatra sisa izany no ataontsika; ary matoky isika satria i Jesoa mahalala ny ankasitrahan’ny Ray mihitsy no mampianatra. Efa nanafatra i Jesoa mba hivavaka mangina sy mitokana, mihidy aman-trano aza rehefa mivavaka fa tsy filan-dera hoe izaho masina sy tia vavaka. Izay no toe-panahy voalohany. Toe-panahy faharoa: aza maro teny, aza lava resaka, hoy i Jesoa. Izao tokoa manko e: Ray tia zanaka Anrdiamanitra, mahalala izay mety amintsika izy; ka ny valim-bavaka andrandraina tsy miankina amintsika mahay miteny sy lava resaka sy mahay mandahatra. Valina vavaka isika satria tia antsika Andriamanitra.
Antitranterin’i Jesoa manokana kosa ny fahaizana mamela heloka. Teo-panahy lehibe koa izany. Rehefa mangataka famelan-keloka dia tsy maintsy mamela heloka. Tsy hoe mametraka izany ho fepetra ny Tompo, ary tsy isika koa no hanome lesona na hanome ohatra na hanao fepetra an’Andriamanitra. Tia ary mamela heloka tsy misy fepetra ny Ray. Fa tia tena loatra isika raha mangataka famelan-keloka amin’ny ota vitantsika kanefa tsy hamela izay diso tamintsika. Ny fanjakan’Andriamanitra dia fanjakan’ny famelan-keloka. Izany no famonjena. Manaraka ho azy ny antsika olombelona rehefa lohalaharana Andriamanitra.
