9 mey 2024 — I Jesoa Kristy niakatra any an-danitra — Fankalazana manetriketrika — Mandehana mampianatra ny firenena rehetra, hoy ny Tompo ary indro Aho eo aminareo mandrakariva ambara-pahatongan’ny faran’izao tontolo izao — Evanjely Masina nosoratan’i Masindahy Marka (Mk. 16, 15-20)

40 andro aorian’ny fankalazana ny Paka isika anio, mankalaza an’i Jesoa niakatra any an-danitra ary mipetraka eo ankavanan’ny Ray. I Jesoa mandray indray ny voninahitra sy ny haja ary ny fahefana maha Andriamanitra Azy; fa hampandray anjara sy hizara amintsika ihany koa izay noraisiny sy niainany: dia ny fiainan’Andriamanitra ao aminy. Noho ny nitsanganany ho velona sy ny niakarany any an-danitra, dia afaka mandinika sy mibanjina ny lalan-kizorana sy ny ho avy isika, afaka hiandrandra ny lanitra. Ny lanitra izay voatokana ho antsika olombelona mba hanomezantsika voninahitra sy dera an’Andriamanitra Mpahary sy Mpitantana ary fototry ny tena fiainana sy fahasambarana ho antsika olombelona.
Niakatra any an-danitra i Jesoa, tsy hoe: mandao antsika Izy fa hanomana ny toerana ho antsika. Mpandova an’Andriamanitra isika, nataony hiombona anjara Aminy. noho izany indrindra no tsy maintsy hikatsahantsika izay manampy antsika ho tafita any. Ny fiainam-bavaka sy ny fihantrana, ny asa fitiava-namana indrindra no izoran’ny kristianina ny lalana mankany amin’Andriamanitra (Lanitra) ary ao anatin’ny fanetren-tena sy finoana lalim-paka, toy niainan’ireo olomasina efa samabtra mibanjina an’Andriamanitra, no hiainana izany, mba ho i Kristy, mitarika antsika rehetra mankany no tahafintsika miainga eto an-tany mizotra mankany an’danitra.

I Jesoa niakatra any an-danitra àry dia tsy inona fa taratry ny fialantsika eto an-tany hiampita any amin’ny fiainana mandrakizay. Fanantenana sy hery lehibe ho antsika izany, ary tanjon’ny fisiantsika sy ny fiainantsika, koa aoka tsy ho variana hibanjina ny lanitra, fa hiasa hitory ny Vaovao Mahafaly, sahala amin’ireo mpianatra, ka hijoro ho mpikatsaka ny fiainana ao amin’Andriamanitra.

Jesoa ô, ankaherezo ny fonay tsy hifikitra amin’ny zava-mandalo, satria ny nakanao nofo toa anay dia ny hahatonga anay ho zanaka malala, handova ny fiainana mandrakizay.