6 febroary 2024 — Talata, Herinandro Tsotra fahadimy Mandavantaona — Mahatoky amin’ny teniny rehetra ny Tompo, ary tsara fo amin’ny asany rehetra — Evanjely Masina nosoratan’i Masindahy Marka (Mk. 7, 1-13)

Miresaka mahakasika ny fanarahana ny fombafomba jody mialoha ny fisakafoanana ny Evanjely anio: mila manasa tànana ny Jody mialoha ny sakafo. Tsy nanatanteraka an’izany i Jesoa sy ny mpianany, ka nahazo tsikera avy tamin’ny Farisianina sy ny mpanora-dàlana. Nohararaotin’i Jesoa hampitàna hafatra lehibe ho an’ireo nitsikera Azy sy ho antsika mandraka ankehitriny izany.

Toy izao izany lesona izany: tsara ny manasa tànana mialoha ny sakafo, indrindra ho fitandroana ny fahasalamana, fa aza hadinoina kosa ny fahadiovana anaty, fa io no ankasitrahan’Andriamanitra indrindra. Fahadiovana anaty midika hoe: fibebahana marina tokoa amin’ireo fototry ny fahotana. Fibebahana anaty midika ihany koa hoe: fanatanterahana sy ny fiainana ny didin’Andriamanitra, ny didim-pitiavana, toy ny fanajana ny ray aman-dreny ohatra. Fibebahana anaty midika ihany koa fiainana ampifanarahana amin’ny Tenin’Andriamanitra vakiana, dinihana ary henoina isan’andro.