24 janoary 2024 — Alarobia, Herinandro Tsotra Fahatelo Mandavantaona — Sambatra ireo mitana ny tenin’Andriamanitra amin’ny fo tsara sy mahitsy, ka mitandrina azy sy mamoa amin’ny faharetana — Evanjely Masina nosoratan’i Masindahy Marka (Mk. 4, 1-20)
Teo amoron-dranomasina no nampianaran’i Jesoa ireto vahoaka, mahakasika ny voa nafafy. Andriamanitra, ny teniny voa nafafy ary isika rehetra tsy ankanavaka no tany amafazana azy, tsy nifidy olona izy fa namfazana daholo, nisy namokatra betsaka, nisy namokatra kely, nisy ny tsy namokatra mihitsy, niakany toetran’ny tany, niakany tamin’ny toetry ny fontsika. Mety ny fontsika donto tsy mahay mihaino ny teny dia tsy namokatra isika. Ka izany teny afafy izany dia noharin’i Izaia mpaminany: “tahaka ny ranonorana aman’oram-panala milatsaka avy any an-danitra ka tsy hiverina any, raha tsy efa nahavonto sy mahalonaka ny tany, sy mampaniry ny zavatra rehetra mitsiry avy aminy, ka mampahazo voa famafy ny mpamafy, ary hanina ho an’ny mpihinana; toy izany koa ny teniko izay aloaky ny vavako, tsy miverina amiko foana izy, fa mahatanteraka izay tiako sy mahatontosa izay namoahako azy” (Iz 55, 3. 10-11).
Mazava araka izany fa tsy ny tenin’Andriamanitra no tsy mamokatra fa ny tany no mety tsy handray ny teny. Ny sakana voalohany tsy hahafahana mandray ny Teny ka tsy mampamokatra azy dia ny tsy fanekena hanaraka izay takian’ny tenin’Andriamanitra, hahafahana manova ny fiainantsika ho amin’ny fiainam-baovao. Ka rehefa tsy manaiky hiova isika, tsy fo nofo fa fo vato. Sarotra ovana satria mitady tany malemy hanorenam-pangady ka mivadibadika, manara-driandrano, mandeha amin’izay heverina hahazoana tombontsoa. Noho izany tsy hitondra voa ihany koa, tsy afaka hanome voa ny mpihinana, na voa afafy ho an’ny mpamafy. Tsy afaka hitondra soa ho an’ny hafa rehefa tsy mamokatra. Ny fanirian’Andriamanitra anefa dia mba hamokatra isika rehetra ary hitondra vokatra ho an’ny hafa ihany koa. Tsy afaka ny hamokatra anefa isika raha tsy vonona hamono ireo faharatsiana ao anatintsika mba hahafahan’ny tenin’Andriamanitra ho velona sy mamokatra ao am-pontsika.
Mifampivavaha àry isika mba ho vonona handray ny teny sy hampamokatra azy eo amin’ny fiainanantsika andavanandro, satria izay no lalana hampamokarana ny fanjakan’Andriamanitra eo anivontsika.
