Alakamisy 12 marsa 2020 — Herinandro faharoa amin'ny Karemy — Evanjely Masina nosoratan'i Masindahy Lioka 16, 19-31 — Indro ankehitriny ny fotoana tsara, indro ankehitriny ny fotoam-pamonjena.

Tsapan'i Kristy fa nisy tokoa ny tsy fitoviana tamin'ny fotoan'androny : manan-karena sy mahantra. Nisy ny tsy fahamarianana sy ny tsy rariny : ambony latabatra sy mitsindroka amin'ny tany. Izay nahatonga azy hanao fanoharana mampandinika eto, ary misarika ny saintsika mba hamakafaka izay endriky ny tsy fitoviana eny anivon'ny fiarah-monina eny Izy. Tsy ho an'ny Farisianina ihany ny fampianaran'i Kristy eto, fa ho antsika ankehitriny ihany koa, indrindra indrindra isika mamakivaky ny Karemy fibebahana sy fandinihan-tena izao. Mandefa hafatra ho antsika Izy, mba tsy ho latsaka amin'izany toetra manavakavaka izany ihany koa isika.

Tsy maintsy sokafana ny maso mba hijery ireny tsy fitoviana ireny, ary amin'izao vanim-potoan'ny Karemy izao no fotoana hiadiana amin'izy ireny mba tsy hisy endrika fifanilikilihana na fifanambaniana amin'ny samy olombelona. Tsarovy fa hoy ny ohabolan'ny Ntaolo hoe : "Ny soa atao levenam-bola, ary ny ratsy atao kosa, loza mihantona". Ny fiainana eto an-tany dia tsy ho anao samirery fa ho an'ny besinimaro, ary izay fitoviana izay no naharian'Andriamanitra antsika, hiaina ao anatin'ny fahasambarana, hiaina ao anatin'ny fanantenana sy ny fiadanana.