10 jolay 2023 — Alatsinainy, Herinandro Tsotra fahefatra ambin'ny folo Mandavantaona — Taona tsy ankasa — Ny teninao, ry Tompo dia fanahy sy fiainana. Ianao no manana ny teny mahavelona mandrakizay — Evanjely Masina nosoratan’i Masindahy Matio (Mt. 9, 18-26)

Fanomezan’Andriamanitra ho antsika ny Finoana, ary io no antoky ny famonjena ho antsika olombelona. Ny Evanjely àry eto, dia maneho ny fifandraisana eo amin’ny Finoana sy ny fahasitranana. Ny lehiben’ny Sinagoga no nangataka an’i Jesoa mba hamelona ny zanany vavy sy ilay vehivavy nitsi-drà nandritra ny taona maromaro. Sarobidy ho antsika olombelona tokoa ny aina ka manao ny fomba rehetra mba hahavelona an’izany, ka atao izay hampanalavirina amin’ny aretina tsy ho any amin’ny fahafatesana. Fa tokony hitodika aminy mandrakariva isika, tsy hoe rehefa tojo tsy fahasalamana ihany fa na dia salama ihany koa aza. Ny Eglizy dia manana ny Sakramenta izay fanome ho an’ny marary mba hahazoana fanamaivanana sy fahasalamana amin’ny aretina sy ny fahosana. Ary na tsy sitrana aza dia manan-kery hizakana ny aretina, satria manakambana ny fijalian’ny tenany amin’ny an’i Kristy.

I Kristy àry no loharanon’aina ho antsika, ka mila miaina ny finoana isika manoloana izay mety ho tahotra sy fahoriana. Izy ihany no afaka manasitrana antsika, tsy ny ara-batana fotsiny fa indrindra ny ara-panahy. Ny fanasitranana ataony mantsy dia tsy mijanona eo amin’ny ara-batana fotsiny fa mampihavana tanteraka tokoa amin’Izy Andriamanitra. Izy irery araka izany no mpamonjy antsika. Tian’Andriamanitra ny hahavelona antsika, tsy tiany ho faty ao anatin’ny fahotana isika, ka irìny mba hihavana mandrakariva miaraka Aminy. Ho antsika kristianina àry, dia tsy miala amintsika ny fiainana amin’ny andro hahafatesana fa miova makany amin’ny fiainana mandrakizay.

Tompo ô, mino izahay fa Ianao no hany tokana Mpamonjy.