5 jolay 2023 — Alarobia, Herinandro Tsotra fahatelo ambin'ny folo Mandavantaona — Taona tsy ankasa — Andriamanitra nampihavana an’izao tontolo izao aminy indray tamin’ny alalan’i Kristy sy nametraka indray ny teny fampihavanana tamintsika — Evanjely Masina nosoratan’i Masindahy Matio (Mt. 8, 28-34)
Manohy ny diany miaraka amin’ny mpianany i Jesoa. Taorian’ ny onjan-dranomasina nanjo ny mpianany, no misy ireto roalahy azon’ny demony ireto indray tojo azy ireo, izay toa sakana ho an’ny mpianatra amin’ny fizorana miaraka amin’i Kristy, fa sakana ihany koa ho antsika manara-dia Azy ankehitriny miaina ny Evanjely.
Ny ratsy sy ny demony dia mialokaloka sy mitoetra ao amin’ny ranomasina, ary araka ny Soratra Masina, ny ranomasina no fitoeran’ny demony. I Jesoa irery ihany, amin’ny maha Andriamanitra Azy, no manana fahefana mandroaka azy ireo hiverina any amin’ny toerany. Ary ireo nomena fahefana, tsy mandroaka ny demony amin’ny anaran’ny tenany, fa amin’ny anaran’i Jesoa Kristy.
Tsy ireo sitrana, nialan’ny demony eto no tiana hasongadina fa ireo mpiandry ny kisoa sy ny mpiaray tanàna tamin’ireto azon’ny demony, izay nanda ny asan’Andriamanitra tao amin’i Jesoa hahatonga ny fanjakany eto amin’izao tontolo izao, araka ny voalazan’i Masindahy Matio 28, 18: “Efa nomena Ahy ny fahefana rehetra any an-danitra sy ety an-tany”. Io fahenan’i Kristy io no hanafaka antsika amin’ny ratsy, haha olona afaka antsika tanteraka. Ka ny mangeja antsika, dia tsy misy afa-tsy ny fahotana.
Tsy mpanao “magie” na fahagagana i Jesoa, tonga eto amin’izao tontolo izao, fa Zanak’Andriamanitra Izy, tonga hanorina ny fiainam-baovao hanjakan’Andriamanitra, tonga hanala ireo sakana tsy mampizotra antsika olombelona miaraka Aminy any amin’ny Lanitra, tonga hanafaka antsika amin’ny asan’ny ratsy izay mamily lalana antsika mizotra mankamin’Andriamanitra. Meteza handray Azy, fa Andriamanitra Izy; maneke hafahany ary aza manary ny fahasoavana entiny.
Jesoa ô, tonga hampihavana anay amin’ny Ray Ianao, hanafaka anay amin’ny fahotana sy ny haratsiana, koa aza avela hanary tena izahay fa tolory tana-mamonjy mba ho anisan’ireo navotanao.
