22 jona 2023 — Alakamisy, Herinandro Tsotra faharaika ambin'ny folo Mandavantaona — Taona tsy ankasa — Efa nataoko hoe sakaiza ianareo, hoy ny Tompo, satria efa nambarako taminareo avokoa izay rehetra reko tamin’ny Ray — Evanjely Masina nosoratan’i Masindahy Matio (Mt. 6, 7-15)
Fampianarana vaovao momba ny fivavahana ny Evanjely anio. Tohin’ny fampianarana hoe mivavaha mangina fa aza mila dera aman’olona, eto kosa indray aza be resaka, aza maro teny. Mahita hatramin’izay lalina indrindra Andriamanitra ka tsy mila resa-be mandangolango. Izao manko : Ray be fitiavana Andriamanitra ka mahalala izay ilain’ny zanany ara-batana sy ara-panahy. Tsy hoe noho isika mahay mandaha-teny sy lava resaka dia resy lahatra Andriamanitra ka mamaly antsika. Henoim-bavaka isika, mahazo valim-bavaka isika satria be fitiavana Andriamanitra. Noho ny fitiavan’Andriamanitra antsika dia henoiny vavaka isika, valiany antso isika.
Ny vavaka nampianarin’ny Tompo, vavaka niloaka teo am-bavan’i Jesoa mihitsy, modelin’ny vavaka kristianina. Fanomezam-boninahitra an’Andriamanitra ny voalohany ; aoka ialana mihitsy ny vavaka toy ny kabarin-tsaka ka tsy mahalala afa-tsy ny “omeo” ; ny momba an’Andriamanitra, ny fanamasinana ny anarany, ny fanjakany, ny sitra-pony. Izany no famonjena. Tsy firariana fe firariana ireo vavaka ireo fa atao toy ny drafi-piainana. Omena ny toerana voalohany sy lehibe indrindra Andriamanitra.
Manantitrantitra momba ny famelan-keloka i Jesoa : mifandray mivantana ny famelana azontsika sy ny famelana omentsika ; tsy misy mendrika fa samy mpanota daholo ka mila mifamela. Raha mamela heloka anefa isika tsy midika fa manan-jo hitaky antoka amin’Andriamanitra hoe “efa namela aho izay iny ka mba avelao koa, ry Tompo” ; tsy isika no andeha hanome lesona an’Andriamanitra. Mamela antsika sy mamonjy antsika maimaim-poana Andriamanitra satria tia antsika Izy, mora fo sy be fitiavana Izy. Isika mamela heloka dia midika fa mamokatra eo amin’ny fiainantsika ny famindram-po sy famelan-keloka azontsika tamin’Andriamanitra. Fitiavan-tena tafahoatra ny mangataka nefa tsy mba mahalala manome. Harovan’Andriamanitra tsy ho latsaka amin’ny fahotana anie isika. Amen.
