2 mey 2023 — Talata, Herinandro fahefatra fankalazana ny Paka — Ny ondriko mihaino ny feoko, hoy ny Tompo, fantatro izy ary manaraka Ahy — Evanjely Masina nosoratan’i Masindahy Joany (Jo. 10, 22-30)
Ry kristianina havana ! Ahariharin’i Kristy amin’ny teniny sy ny asany ny maha iraky ny Ray Azy, ary hamafisiny amin’ireo mbola misalasala foana fa “Izy sy ny Ray dia iray ihany”. Samy manana ny fomba fandraisany ny momba an’i Jesoa sy izany fampianarana ombam-pahagagana ataony izany anefa ny olona tsirairay, eny fa na dia isika ankehitriny aza. Misy ny mino avy hatrany fa Zanak’Andriamanitra Izy noho ny fampianarany sy ny teniny izay toa tsy mba feon’olombelona, sy ny asa soa vitany izay toa tsy mba hery avy amin’olombelona no hanaovany azy fa fahefana avy amin’Andriamanitra Rainy; ka tsy mila porofo fa mandray sy manatanteraka izany eo amin’ny fiainany. Etsy andanin’izany anefa dia maro ihany koa ireo tsy mino, anisan’izany ny Jody ka mametraka fisalasalana foana na dia efa misy porofo sy famantarana izao aza. Nandiso fanantenana ny Jody mantsy i Jesoa ka noheveriny fa mamitaka azy mihitsy aza.
Nandrandrain’izy izy ireo ho ilay “Mpamonjy Masina” nampanantenain’Andriamanitra ny vahoaka Jody hatramin’izay i Jesoa, kanjo tsy araka ny niheverany izay ho toetran’ny Mesia no hitany, hany ka teraka tao amin’izy ireo ny fisalasalana, izany hoe ny tsy finoana. Noho izany, hoy izy ireo nanontany an’i Jesoa: “Raha ianao no Kristy, mba lazao tsotra aminay”. Ireto vahoaka Jody ireto tokoa ilay hoe tsy mino maty raha tsy avy mandevina, fa etsy an-kilan’izany tsy finoan’izy ireo izany koa ny maha jody an’i Jesoa mitovy amin’izy ireo ka nahatonga an’i Jesoa ho Mpaminany tsy masina an-taniny. Isika koa mantsy dia manana io fisalasalana sy fomba fiheverana toy ny an’ny Jody io indraindray ka mahatonga antsika tsy hino na koa hinohino foana indraindray ary izany no mitarika antsika hanaotao foana na hanao izay saim-pantatsika eo amin’ny fiainana maha kristianina antsika. Namaly tsotra koa anefa i Jesoa ary ny zavamisy no namaliny azy ireo: “Efa nilaza taminareo aho fa tsy mino ianareo”. Tsy nety nandray na nino ny tenin’i Jesoa sy ny asany izy ireo noho i Jesoa iray rà aminy. Izany fomba fisainana izany manko manakana antsika tsy handray ny famonjena antsika indraindray. Rehefa isika no tonga amin’ilay mijery olona sy mijery “valeur”, dia tsy mety maninteraka amintsika mihitsy izay teny lazaina amintsika. Anisan’ny maha sarotra sy vato misakana ny fitoriana ny Vaovao Mahafaly mandrak’ankehitriny izany fomba fisainana izany. Noho izany tsy finoana izany dia tsy hanana anjara amin’i Jesoa ireo Jody ireo satria sarotra ho azy ny hanaiky azy ho Tompo.
Izay mandray ny teniny amim-pinoana ho fahamarinana ary mitandrina izany eo amin’ny fiainany anefa no tena mahazo ny fiainana. Aoka àry ho fantatsika fa ny safidy hanara-dia an’i Jesoa dia mila havaozina isan’andro fa tsy hoe valin-teny indray mandeha monja. Tsy mety noho izany ny fanaovana an’i Jesoa ho “havako raha misy patsa”. Ary isika koa tsy hanadino ny hanavao isan’andro ilay finoana nekentsika na neken’ireo ray aman-dreny sy mpiantoka antsika fony isika natao batemy. Raiso ho hery àry ny Tenin’Andriamanitra mba hamelombelona ny fiainam-panahintsika ka hahatonga antsika ho ilay ondry mahay mihaino mandrakariva ny feon’Izy Tompo miteny amintsika.
Jesoa Tompo ô ! Ireo izay mihaino ny teninao dia hanambarànao fa Mpamonjy ianao. Sokafy ny fonay mba hinoanay tokoa fa Ianao no ilay iraky ny Ray. Amen !
