Talata 7 febroary 2023 — Herinandro Tsotra fahadimy Mandavantaona — Taona tsy ankasa — Mahatoky ny lahatrao, ry Tompo, ary mafy orina mandrakizay alaovalo — Evanjely Masina nosoratan’i Masindahy Marka (Mk. 7, 1-13)

“Nahoana ny mpianatrao no tsy mitandrina ny fanaon-drazana, fa mihinana amin’ny tanana tsy misasa?” Io no fanontaniana nentin’ireo Farisianina sy mpanora-dalàna tamin’i Jesoa. Ny manasa tanana alohan’ny sakafo dia tsy fombam-pivavahana akory fa fahalalam-pomba ara-pahasalamana. Ary i Jesoa tsy nandà mihitsy hoe tsy ilaina ny fanasan-tanana fa fihetsika kosa izay tsy misy hifandraisana amin’ny fanomezam-boninahitra an’Andriamanitra izany, satria fomban’olombelona ihany. Eo imason’Andriamanitra tokoa anie dia tsy ny fombantsika no hitsarana antsika fa ny fitiavana izay ao anatintsika ao.

Tsy tian’i Jesoa isika, noho izany, ho voafatotry ny lalàn’olombelona, izay zavatra ety ivelany no mila tandremana bebe kokoa. Ny didin’olombelona mantsy dia tsy mahasolo na oviana na oviana mihitsy ny didin’Andriamanitra. Ny didin’olombelona mantsy dia ny fanaovana sy ny fanatanterahana azy no zava-dehibe, mba hialana amin’ny sazy izay mety hihatra sy mba ho hitan’ny hafa hoe manao ny fanaon’ny olona. Fa ny didin’Andriamanitra kosa, dia ny fitiavana eo am-panatanterahana azy no jerena fa tsy ny fahavitana akory. Azo atao tsara ange ny mitondra fanatitra ho an’Andriamanitra tsy am-pitiavana, satria ny tanjona dia ny hoe hitan’ny olona mitondra fanatitra, manaraka ny Lalàna. Fa raha atao am-pitiavana izany dia ny didin’Andriamanitra no manjaka ao amintsika. Ataovy am-pitiavana àry ny zavatra rehetra eo imason’Andriamanitra.

Tompo ô, enga anie ny fomba amam-panaonay mba tsy ho sakana amin’ny fanarahanay Anao.