Sabotsy 4 febroary 2023 — Herinandro Tsotra fahefatra Mandavantaona — Taona tsy ankasa — Ny ondriko mihaino ny feoko, hoy ny Tompo. Izaho mahalala azy, ary izy manaraka ahy — Evanjely Masina nosoratan’i Masindahy Marka (Mk. 6, 30-34)

Ity Evanjely nambara teo ity no maneho fa tsy ny asa atao ihany akory ny manara-dia na mamaly ny antson’i Kristy fa filazana ny natao sy fibanjinana Azy maniraka, ary fandinihan-tena tamin’izay fomba nentina nanao ny asa nanirahana sy ny vokatra aterany. Io no hevitry ny fitokanana niantsoan’i Kristy ireto Apôstôly, rahefa niverina avy namita ny iraka izy ireo. Nantsoiny hiala sasatra, izany hoe: hanavao ny fiainana sy hanovo hery indray ao aminy.

Fa izany indrindra no iainana sy ianarana an’i Kristy, mba hananantsika manara-dia azy sy irahany, ny toe-po nananany, dia ny ho fatra-pangoraka sy mpiantra ny vahoaka.

Ry Jesoa Mpamonjy anay ô, nangoraka ireto vahoaka nanara-dia anao ianao, tsy namela azy ho toy ny ondry tsy misy mpiandry ka nahafoy ny fotoana ialanao sasatra mba hampianarana azy ireo, hanomezana azy ny teninao mahavelona.

Fitiavana lehibe tokoa no nasehonao ary fampianarana tsara indrindra, ho an’ireo manana sy anakinana adidy sy andraikitra, anisan’ireny ireo ray aman-dreny sy ireo miadidy ny fiainam-bahoaka, ireo mipetraka ho lehibe sy ho tompon’andraikitra eo amin’ny sehatra maro samihafa, ireo nomena fahefana hitantana sy hitondra ny vahoaka isan’ambaratongany… koa aza avela hanao ankilabao izay iadidiany izy ireo fa mba ho eo anilany mandrakariva.