Talata 31 janoary 2023 — Herinandro Tsotra fahefatra Mandavantaona — Taona tsy ankasa — Mahatoky ny lahatrao, ry Tompo, ary mafy orina mandrakizay alaovalo — Evanjely Masina nosoratan’i Masindahy Marka (Mk. 5, 21-43)

Amin’ny alalan’ireto fanasitranana roa ireto no anehoan’i Masindahy Marka amintsika ny maha “Mpamonjy” an’i Jesoa. Tsy mijanona ho fahasitrana ara-batana fotsiny anefa, fa miampita amin’ny ara-panahy, satria ny finoana ananan’ireo manatona sy mila vonjy aminy, no ambaran’i Jesoa hoe: “nahavonjy azy ireo”.

I Jaira eto no maneho ny finoany ary matoky fa rahefa hametrahan’i Jesoa ny tanany ny zanany vavy dia ho sitrana. Ary izany finoana efa ao aminy izany no mbola hamafisin’i Jesoa ilazany hoe: “Aza matahotra fa minoa fotsiny ihany”, ary dia sitrana soa aman-tsara razazavavy. Toy izany koa ity vehivavy nitsi-drà nandritra ny taona maro, nino sy natoky fa na dia “ny fitafian’i Jesoa ihany aza voakasikasiny dia ho sitrana izy”. Ka dia ritra niaraka tamin’izay ny loharanon’aretiny.

Ireo tantara roa ireo no entina hilazana amintsika fa ny maha Mpamonjy an’i Jesoa Kristy dia tsy mijanona fotsiny amin’ny ara-nofo, fa mifototra indrindra amin’ny ara-panahy, dia ny havelona antsika ao amin’Andriamanitra. Mpamonjy hanafaka antsika amin’ireo sakana maro tsy ahafahantsika manatona an’Andriamanitra Izy.

Enga anie mba ho ny tena hahavelona antsika ara-panahy ao amin’Andriamanitra, no hanentana antsika amin’ireny fanehoam-pinoana ataontsika ireny, mba hahazoantsika ny famonjena entin’i Kristy.